La statue de Mercure (Baudoin, 1638) - Briot

1. « Briot fe. » sur la pierre au pied de Mercure.

2. Sur la page de droite :

« Des Statues en general, & particulierement de celle de Mercure.
DISCOVRS LIII.
Ayant à traicter succinctement cette matiere, qui me semble assez divertissante, j’en diviseray le discours en deux principaux poincts, comme j’ay fait le precedent. En l’un, aprés avoir parlé des Statuës en general, je descendray en particulier à celle de Mercure, qui ne se faisoit pas de tout bois, comme dit l’ancien proverbe ; & en l’autre j’en donneray l’explication aprés Alciat. Pour le premier poinct, je rapporteray icy ce que j’en ay escrit autrefois ; & commençant par les ouvriers, je diray, que comme ils sont divers en sçavoir, les matieres aussi, sur lesquelles ils travaillent, sont differentes. Parmy ceux qui se sont meslez autrefois de faire des ouvrages d’argile (Art que les Latins appellent Plastices) les Anciens ont tenu pour excellents Maistres Demophilus, Gorgasus, & Porsuinius, qui selon Varron, forma de terre certains poissons, si au naturel, qu’ils sembloient estre viuans : & pareillement Arcesilaus, à qui Luculle donna soixante Sesterces, pour vne Statuë de la Deesse Venus ; sans oublier Turianus, qui fit le simulachre de Iupiter Capitolin, & celuy d'Hercule, auec vn artifice inimitable… »