Escale des Troyens aux îles Strophades. Les Harpies, Céléno.
Postquam altum tenuere rates, nec iam amplius ullae
adparent terrae, caelum undique et undique pontus,
tum mihi caeruleus supra caput adstitit imber,
noctem hiememque ferens, et inhorruit unda tenebris.
Continuo uenti uoluunt mare, magnaque surgunt
aequora ; dispersi iactamur gurgite uasto ;
inuoluere diem nimbi, et nox umida caelum
abstulit ; ingeminant abruptis nubibus ignes.