Les Troyens longent la côte sicilienne. Arrivée à Drépane. Mort d'Anchise
Vix ea fatus erat, summo cum monte uidemus
ipsum inter pecudes uasta se mole mouentem
pastorem Polyphemum et litora nota petentem,
monstrum horrendum, informe, ingens, cui lumen ademptum.
Trunca manu pinus regit et uestigia firmat ;
lanigerae comitantur oues ; ea sola uoluptas
solamenque mali.
Postquam altos tetigit fluctus et ad aequora uenit,
luminis effossi fluidum lauit inde cruorem,
dentibus infrendens gemitu, graditurque per aequor
iam medium, necdum fluctus latera ardua tinxit.