Assemblée des dieux. Vénus plaide pour Énée devant Jupiter. Junon lui répond. Jupiter ne prendra pas parti.
Panditur interea domus omnipotentis Olympi,
conciliumque uocat diuom pater atque hominum rex
sideream in sedem, terras unde arduus omnis
castraque Dardanidum adspectat populosque Latinos.
Considunt tectis bipatentibus, incipit ipse :
« Caelicolae magni, quianam sententia uobis
uersa retro tantumque animis certatis iniquis ?
Abnueram bello Italiam concurrere Teucris.
Quae contra uetitum discordia ? Quis metus aut hos
aut hos arma sequi ferrumque lacessere suasit ?
Adueniet iustum pugnae, ne arcessite, tempus,
cum fera Karthago Romanis arcibus olim
exitium magnum atque Alpes immittet apertas :
tum certare odiis, tum res rapuisse licebit.
Nunc sinite et placitum laeti componite foedus. »
Iuppiter haec paucis ; at non Venus aurea contra
pauca refert :