Destruction du palais de Priam par Pyrrhus.
Hic uero ingentem pugnam, ceu cetera nusquam
bella forent, nulli tota morerentur in urbe.
Sic Martem indomitum, Danaosque ad tecta ruentis
cernimus, obsessumque acta testudine limen.
Haerent parietibus scalae, postisque sub ipsos
nituntur gradibus, clipeosque ad tela sinistris
protecti obiciunt, prensant fastigia dextris.
Dardanidae contra turris ac tota domorum
culmina conuellunt ; his se, quando ultima cernunt,
extrema iam in morte parant defendere telis ;
auratasque trabes, ueterum decora alta parentum,
deuoluunt ; alii strictis mucronibus imas
obsedere fores ; has seruant agmine denso.