Deuxième escale des Troyens, à Délos. Énée au temple d'Apollon.
Sacra mari colitur medio gratissima tellus
Nereidum matri et Neptuno Aegaeo,
quam pius arquitenens oras et litora circum
errantem Mycono e celsa Gyaroque reuinxit,
immotamque coli dedit et contemnere uentos.
Huc feror ; haec fessos tuto placidissima portu
accipit : egressi ueneramur Apollinis urbem.
Rex Anius, rex idem hominum Phoebique sacerdos
uittis et sacra redimitus tempora lauro,
occurrit ; ueterem Anchisen adgnouit amicum.
Iungimus hospitio dextras, et tecta subimus.
Templa dei saxo uenerabar structa uetusto :
Da propriam, Thymbraee, domum ; da moenia fessis
et genus et mansuram urbem ; serua altera Troiae
Pergama, reliquias Danaum atque immitis Achilli.
Quem sequimur ? Quoue ire iubes ? Vbi ponere sedes ?
Da, pater, augurium, atque animis inlabere nostris.ʼ