Achéménide et le Cyclope.
Postera iamque dies primo surgebat Eoo,
umentemque Aurora polo dimouerat umbram,
cum subito e siluis, macie confecta suprema,
ignoti noua forma uiri miserandaque cultu
procedit, supplexque manus ad litora tendit.
Respicimus : dira inluuies inmissaque barba,
consertum tegumen spinis ; at cetera Graius,
et quondam patriis ad Troiam missus in armis.
Isque ubi Dardanios habitus et Troia uidit
arma procul, paulum aspectu conterritus haesit,
continuitque gradum ; mox sese ad litora praeceps
cum fletu precibusque tulit : ʻ Per sidera testor,
per superos atque hoc caeli spirabile lumen,
tollite me, Teucri ; quascumque abducite terras ;
hoc sat erit. Scio me Danais e classibus unum,
et bello Iliacos fateor petiisse Penatis ;
spargite me in fluctus, uastoque inmergite ponto.